ALUH

Blag…..blag……blag…..uek….uek……uek….ia teka sing mabaju, pejalane srayang-sruyung ninjak jelanan umahne sambilanga ngutahang isin basang, bes keliwat punyahne di kafé nginum inuman soroh bir lan suba maimbuh tuak arak uling slidan dijumahne. Uling jam 8 peteng ngalihin somah lan pianak saget jam dua semengan ia mara teka uling kafé meliang-liang ajaka sekaa tuakne. Keto dogen geginane sebilang wai nanging somahne satya pisan ngayahin, ngampakang jelanan kurenane ane teka sebilang das lemahe. Minab yen sing ampakang lakar ngrebeda, papak samparanga, uuga, pamuput pacang ngae uyut di banjarane lan sane pinih mabuat pesan ia madalem pianakne daduanan luh muani ane luh mara masuk kelas 3 SD lan ne muani mara matuuh petang tiban pang sing manggihin laksanan bapane ne kaon. Keto dasar somahne anteg jani nu lascarya ngayahin . Nanging sujatine dikenehne suba sakit pesan makurenan nepuk unduk buka kene.
Cara janine pipise ngasorang kasujatian, kasatyan, makejang kalahang ban pipis, apa alih lan tagih ada, yen iraga suba ngelah pipis. Bilih-bilih sangkaning pipis  lali ring kulawarga buka unduke ne rasaanga ken Luh Santhi jani. Nanging yen ngelah pipis ulian pemargi ane patut mula meweh pisan. Kewala di jamane cara jani ngalih pipis ulian aluh liu gati carane. Buka gegaene I Mada sane saraina nuduk togel. Yen selehin  awai ia maan nuduk togel kirang langkung limang yuta rupiah, lan polih upah kirang langkung samas seket tali rupiah. Ne awuku polih nuduk pang lima riantukan raina anggara lan sukra sing ada bukakan togel. Yen pinehang liu pesan ia ngelah pipis ulian upah nuduk togele ento, apa buin yen ada anak ngukup sinah buin baanga ngidih pipis. Cara janine dija ngalih gajih liu keto. Tuah negak lan nulis angka dogen, pipis ba banjarane ngabaang ka jumah, saihang teken pagajian numbeg, ngalap cengkeh ne paling liu maan upah maburuh wah petang dasa tali. Kewala I Mada buka gede ombak gede angine. Liu ngelah pipis liu masi penelahne. Ap buin penelahe ulian laksana ne tuara manut. Buka gegaene ne setata ka kafé. Punyah payu pipis telah apa sing ada. Keto masi yen digesit tampake sengakala ne tepuk. Togel wantah judi ne kalarang olih pemerintah. Yen ada operasi uling polisi dueg-duegan ngingkebang awak. Di agete sing bakata ken polisine. Kewala I Mada sing taen ngelah rasa jejeh sawireh ia suba ngelah bos ne suba dadi besik ajaka polisine. Sinah yen ada operasi ia lakar sing taen katangkep.
Semengan ia bangun negak di bale sekapate nginyah sambilanga ngopi lan ngecelin siap. Sing ngrunguang somah lan pianakne ne kar mejalan masuk.
“ Pa tiang nunas jinahe limang tali rupiah pang ada angge bekel masekolah”. Bapane masaut bangras, “Bih…koos nyaine ajak pipis, ibi suba baang pipis, jani buin nagih, apa gen beli nyai. Ne duang tali dogen ba liu. To memen nyaine idihin buin”. Nyaruang pipise suba telah di kafé.
Nglingus panakne ngalih memene ka paon ngambeng yeh paningalane. Sing dadi ati memene ningalin panakne buka keto. Enjuina pipis limang tali sisan meli darang nasi lantas jagjagina kurenane.
“ Bli…nguda las kene bli ngajak pianak, bes amonto ne beli maan upah nuduk togel, bantes maang panak bekel limang tali sing ngidaang. Semengan ba ngecel siap, tengai mamunyah, sanja ba ilang, dong sing ke bli lek ajak banjarane dini? Tiang nak nglah pangrasa, lek ningehang ortane disisi. Jani suud malu ngecel siap atoang malu pianake masuk.”
“Apa orang nyai mara? Gemelanene baang cepok tawanga asane. Beli sing taen ngrungunang orta anake di sisi. Kadung ke bli oranga kene, keto, bli sing taen ngurusang. Tuah masi bli sing taen ngrepotin ia, keneh-keneh bli, pipis-pipis beli. Keto masi nyai da lebian munyi yen sing ulian pagaen beline ne nyai kar sing ngamah apa be. Jani bisaang ibane alihang panake ojek! Beli sing ngidang ngatoang”.
Pedih pesan somahne ningehang pamunyin kurenane ane bangras buka keto. Pang sing dawa urusane ngenggalang Luh Santhi nandan panakne ke rurunge ngalihang ojek apang sing kasep masuk. Sambilanga nginyang panakne ne kadekan. Lantas mragatang malebengan, konden maang kucit ngamah, ngumbah prabot miwah sane lianan. Rikala somahne ibuk magarapan, I Mada ngenemin timpalne ugase bajang, ne tumben malali sukat ia megae di rantauan. Lan sing melah tetegakane yen sing metimpal tuak. Ditu suba ngendah tuturne I Mada ngorang iban sugih, sing kuangan apa, kewala dong sing ada apa. Gengsine bes keliwat. Sambilanga nyatet nomer togel pasangan banjarane ditu. Kesiab timpalne ningalin. Dong kene ya gegaene I Mada sangkal ngorang iban sing kuangan apa, liu ngelah pipis ulian dadi tukang nuduk togel. Keto dikeneh timpalne I Mada.
” Da uling pidan cai nyemak gae nuduk togel? Sing takut cai ejuk polisi?”
“Beh cai nu doen belog desane pondong. Ake ba dadi besik ajak polisine. Joh para ake kar tangkep polisi. Yen cai mekita, mai ne jemak gaene. Udyang cai muntag-mantig ditu makuli di gumin anake, konden buin maimbuh bangkyang sakit, pelih bedik kena PHK. Sing jeg luungan negak, ngopi, sambilang nutur kene maan pipis liu. Engken ada nyet cai?”
“Sing Da. Ake takut masuk penjara.”Cutet bebaosan timpalne.
“ Pak Mada…Pak…Pak….”
“Luh…luh…jajagin ja malu, nyen ya to kauk-kauk. Minab anake kar masang togel to luh.”
“Nah Bli.” Gegeson Luh Santhi nyagjagin. Timpalne I Mada suba paling kipekane. Makeneh Polisi ne teka ka umahne I Mada. Takut ia bareng kaejuk. Ngenggalang ia tuun uli balene  nyaluk sandal lakar ngenggalang mulih.
“ Kar kija cai? Adi rengas galak kene. Tumben ne cai malali mai. Nden malu mulih.”
“ Ake takut Da, ake sing nawang apa-apa ne Da”
“ O… cai takut jak polisi. To sing ja polisi. Ba omonto ne orain ake. Ake sing bisa ejuk polisi. Yen to polisi ne isin dompet ake aba ba mulih. To banjarane ne sai-sai masang togel dini. Jeg jejeh doen cai.” Buung timpalne mulih lek masi ia teken I Mada nanging kenehne ba uyang paling jejehne keliwat. Teka lantas somahne ajaka anake ne kauk-kauk ento. Awakne gede-gede tegeh, sebengene aeng pesan, mebok gondrong ukah INTEL Polda. Timpalne I Mada makesiab ningalin lan sayan-sayan jejeh. Jani suba iraga kar masuk penjara. Duh ratu sasuunan titiange swecanin ja panjak ratune, mangda tiang ten keni sengkala. Keto pangacepne. Sambilanga ngesisiang negak apang aluhan melaib. Apa buin ningalin sebengne I Mada ne ba ocem matadah takut. Nyumekenang yen to seken suba polisi ne kar ngejuk I Mada. Keto masi I Santhi suba sing ngidang ngomong apa. Nah jani ba gantine masuk penjara. Keto masi I Santhi makeneh.
“Pak durusang malinggih! Niki kurenan tiange. Nanging tiang nunas ampunang pesan tangkepe kruna tiange, sambilanga ngeling sig-sigan.”
“Tiang ten ja kar nangkep kurenan Ibuke lan makta ka panjara. Tiang ten ja polisi. Nanging tiang pacang makta saluire piranti ne Pak Mada kredit saking tokon tiange. Santukan ngawit ngambil nyantos mangkin kurenan ibuke wantah naur ping siki. Ping dasa ampun ten polih naur.”
I Santhi sing ngidang ngomong apa, keto masi I Mada. Dugi kar mayah kreditan pipis ba telah di kafé ibi sanja. Bengong nyelselang dewek, lek ken banjarane ningalin barang-barangne kajanga ken pegawai tokone. Keto pipise bakat ulian aluh, aluh masi ban nelahang pamuputne sangsara ne panggihin.