Paid Tiang

Paid tiang tindakan batisé
Ngalahin ukudan sasihé
Ngipekin kalah
Sisan-sisan kenehé suba kacamputang
Pakpak katelahang
Apanga tusing taén buin
Ngurimik ipit ngumbar kita
Paid tiang makejang
Ngejohin sasih
Ané tusing taén bakatang
Paid tiang makejang
Nguberin sasih
Ané tusing taén gelahang
Camput mapaid
Telah-telahang kauluh.

olih : I Wayan Paing

NGANTOSANG

Di betén muncuk lalangé lanying
Nyungéngét ngantosang ulungan ia i capung
Ané paling tusing nepukin sunutan mulih
Kletik-kletik suaran detik
Pamargin Ida Betara Kala tatar alon
Nyaksiang patongosan tiangé dini
Bengong mapaliat samah
Pakukékkak kéék-kéék
Munyiné i katak mapag sasih
Buin nepukin tiang dini
Yapin atiban suba liwat patemoné malu
Dini, padidi
Tiang ngantosang
Layuné ya i lalang
Ngulungang kulesan capungé né aptiang

olih : I Wayan Paing

PAWAYANGAN

Ring kletakan suaran cempala
Sané kakilit bebatélan gendér
Kayonané mapolah
Sakadi gunungé rubuh
Sakadi suryané anincap gunung
Sakadi paksiné anglayang
Sakadi tukéné anyud
Ri tatkala sanghyang ringgit
Tedun ring sajeroning pawayangan
Sangkaning pangastitin ki dalang
Rumasa titiang ring padéwékan
Tan bina sakadi wayang
Semeng sanja lemah peteng
Buduh paling ngulurin kalanguan
Lipia ring uripé cendek
Kayonané gelisan matanceb
Kasineb antuk geguneman
Kija mangkin pacang ruruh ki dalang
Damar bléncongé sampun padem

Jakarta, Agustus 2007

olih : IDG Palguna

SINOM-SINOMAN WREDA

Puniki carita kalintang nista
indik wang lingsir
sinoman wreda dané kasengguh
apan nguni kocap kasudi
pinaka tameng papacek gumi

Mangkin
ipun i sinoman wreda
nandang idup kalara-lara
tan pasanak braya
nyabran rahina nyliksik bulu
saha ngapé-apé jagaté wayah
majalaran tembang mawarni pinunas:
déwa ratu sang hyang embang
kedeh titiang mangastiti
i ratu sang ngawiwenang
uripé sané asiki
mangkin meled titiang ngapti
mangda i ratu mapuwus
ledang bancut urip titiang
apan tan malih kasidi
mangda puput
utang titiang dadi jatma

Cendek tembang dané
I sinoman wreda
Nanging teges pinunas ipun
Jakti singsal minab pupuhé
Sangkaning tuwuhé nampekin sanja
Nanging sira ugi jagi urati
Mapidabdab indik tembang
Ring ulu atiné
Sané kalintang sungkawa

(Beh, i guwak pasliwer gaok-gaok
Mapi-mapi duta hyang yamadipati
mapengarah ring jagat sadaya
wénten manusa mapag pralaya)

Jakarta, Maret 2008

olih : IDG Palguna

LALANG

gerimis sané ulung ngapuan
inggih punika kruna
sané ngamedalang girang
sané ngicénin liang
sané nungkulang galang
sané nyayangang lalang
nulekep ring sidakepan pertiwi
nguntulang raga
pinaka saksi sasih makiré kalima
pinaka saksi bunga sampun kembang
pinaka saksi semeng janten nyemengan
lan, lalang nyarengin
tan paucap apisanan

olih : Pande Kurniawan